HH0-2 gela birtuala: 2019

2019(e)ko abenduaren 19(a), osteguna

ZORIONAK!!!

Asko izan dira trimestre honetan urteak bete dituztenak. Koroia jantzi, zorionak abestu eta kandelei putz egin ondoren, pastela jan dugu beraien eguna ospatzeko! 2 urte potolo! Zorionak!!

Alexian topatuko dituzue beraien argazkiak.

2019(e)ko abenduaren 5(a), osteguna

Ikutu, dastatu, aldatu, moldatu, manipulatu, esperimentatu, disfrutatu, gozatu!

Esperimentazioari eta manipulazioari garrantzi asko ematen diogu gure etapan. HH 0-6ko haurrak, denbora guztian esperimentatzen daude, berezkoa dugun zerbait da, mundua esploratzeko beharra izaten dugu, objektuak manipulatzekoa, gauzen zergatia jakin nahia... horrela joaten gara gure ingurua ulertzen.

Berezkoa dugun kuriositate eta jakin min hau estimulatu behar dugu eta honetarako manipulazioa eta esperimentazioa tresna baliogarria da.

Azken egunetan, plastika gelan, ogi xigortuarekin esperimentatzen ibili gara. Tamaina eta forma ezberdineko tresnak eman dizkiegu ogi xigortuarekin batera eta nahi zutenek material honekin esperimentatzeko aukera izan dute.

Libre lagatzen diegu manipulatzen, nahi duten tresna aukeratzen, dastatzen, botatzen, bote batetik betera pasatzen... bitartean hitzez gertatzen ari dena aipatzen dugu, beraiek ere konturatzen joateko eta forma, kantitate eta ekintza ezberdinei izena jartzeko. . "lauki hori oso handia zen, orain ez zaizu dena beste laukian sartu / poliki irteten da ogia zulo horretatik / estua da eskuan duzun.."

Oso gustura eta pozik ibili dira, asko disfrutatu zuten. Pare bat argazki lagatzen dizkizuegu eta besteak Alexian izango dituzue ikusgai.

2019(e)ko abenduaren 2(a), astelehena

IKASTOLAKO TXIKIENAK ERE HEMEN GAUDE!!

Gure txikienak ere badoaz poliki poliki beraien errutinan ikastolako egonaldia sartzen. Egokitzapen lasai eta egoki baten ondoren gure txikienak hasita daude ingurua esperimentatu eta aztertzen. Batzuk hasi dira katamarran, beste batzuk arrastaka, zutik jartzen direnak ere badaude... bakoitzaren erritmoa errespetatuz bagoaz gutxinaka aurrera pausuak eta aldaketak nabaritzen. Hemen dituzue gure ikastolako txikienen argazki batzuk!!

2019(e)ko azaroaren 4(a), astelehena

Egokitzapenetik egunerokotasunera

Kaixo familia,

Ikasturtea hasi genuenetik pasa dira bi hilabete . Lehen hilabetean egokitzapenean murgilduta egon gara, baina bagoaz poliki poliki egunerokotasunera ohitzen.

Dakizuen bezala, garrantzi handia ematen diogu egokitzapenari, gogorra izaten da eta kurtso hasiera guztiontzat. Familiarengandik banatze une hau lasaiagoa eta errazagoa izateko asmoarekin egiten dugu. Haurraren ongizatea bermatzea da helburu nagusia.

Haurrak erreferentzi pertsona bat behar du eskolan, atxikimendu irudi seguru bat, hau da, testuinguru berri horrek eskaintzen dizkion aukerak esploratzera abiatzeko oinarri seguru bat. Haurrarentzat irakaslea atxikimendu irudi seguru bihurtzen denean; bere buruarekin seguru sentitzea, beldurrak ekiditea, ikastolan gustura ibiltzea, beste haurrekin harreman aberatsagoak egitea eta esploratzen hastea lortuko du.

Horretarako behar-beharrezkoa da denbora, elkar ezagutzeko eta tokia eta laguntxo berriak ezagutzeko. Honez gain, sarritan haurrak bere erritmo biologikoak egokitu behar izaten ditu.Guraso eta irakasleen arteko konfiantza ere beharrezkoa da, horregatik, konfiantzazko lan-talde bat sortu behar dugu.

Esan bezala, garrantzitsua da haurrari behar duen denbora ematea, egokitzapena ez baita prozesu lineal bat. Haur bakoitzak bere denbora eta erritmoa behar du eta irizpide batzuk markatuak izan arren, ume bakoitzaren arabera moldatzen joaten gara, ez dugu prisarik izan behar.

Beraz, laburbilduz, egokitzapen fasea ahalik eta positiboena izateko eta ikastolara eta honen ingurunera ahalik eta ongien egokitzeko, ezinbestekoa da, alde batetik, haur bakoitzaren erritmoa errespetatzea, presiorik eta konparaketarik gabe eta bestetik, senide eta hezitzaileen arteko elkarlana, gure arteko konfiantzak haurra lasaitzen baitu.

Hemendik aurrera zuen haurren egunerokotasunaren inguruko informazio desberdina topatuko duzue hemen.

Jarraian, HH0 eta HH01eko haurren egokitzapen garaiko argazkiak lagako dizkizuegu eta HH2koenak Alexia plataforman topatuko dituzue, gustoko izatea espero dugu.