Oraingo honetan, zentzumenek daukaten garrantzia adieraztera gatoz.
Zentzumenak bizitza osoan zehar garrantzitsuak badira ere, garrantzitsuagoak bilakatzen dira haurraren lehen hiru urteetan zehar. Haurrarengan garatzen den lehen zentzumena, ukimena da. Haurra jaiotzen denean erabat babestua egotetik babesik gabe sentitzera pasatzen da. Uretan egotetik, arnasa hartzen ikastera. Iluntasunetik argitasunera. Espazio mugatu batetik, mugarik gabeko espazio batera. Ematen diren aldaketak hamaika dira. Haurra etengabe informazio berria jasotzen ari da, informazio honen bitartez inguru berri honetara egokitu ahal izateko, eta informazio guztia bere zentzumenen bitartez jasotzen du.
Bere burua eta aita eta ama ezagutu ondoren inguruko beste pertsona eta objektu batzuk ezagutzen hasten da. Hasieran dena ahora eramaten du. Ekintza honekin objektu hori ukimen, dastamena eta usaimenaren bitartez aztertzen ari da. Objektuari buruzko azterketa sakon bat egiten ari da. Bere inguruan zenbat eta baliabide zein objektu anitzagoak jarri, haurrak jasotzen duen informazioa aberatsagoa izanen da. Jartzen ditugun baliabide edota objektuen arabera, haurrak informazio desberdina jasoko du: tamaina, tenperatura, usaia, zaporea, pisua, bolumena …
Jakina den bezala, adin honetako haurrek informazio asko hautematen dute beraien ingurutik eta bizitzako lehen urte hauetan jasotako informazioa bere bizitza osorako baliagarria izango zaie.
Informazio hau, zentzumenen bitartez barneratzen da. Izan ere, zentzumenen bidez, gure inguruak eskaintzen dizkigun esperientziak barneratzen ditugu.
Hori dela eta zentzumenak lantzeko egiten ditugun esperimentazioak, txertatzen joango gara.
Hona hemen, puxikekin ( izoztuak, urarekin beteak, material desberdinekin beteak...) egindako ekintzatxo polit bat ikusgai.
Ea zer iruditzen zaizuen!!!!!
